Dat rüükt na Wiehnachten

Artikel aus dem Nordfriesland Tageblatt vom 18.12.2010

Dat rüükt na Wiehnachten ...
„Plattdüütsche Backen“ in de ADS-Wilhelm-Gehlsen-Kinnergorn
Nordfreesland

Dor liggen se nu op de Kökendisch. Negen lütte Tuten, all mit en Stück bruune Koken in, all mit sülmsschreven Kinnernaam op un all open, dat de Koken noch afköhlen kann. Un mit lang gifft dat noch en plattdüütsche Backrezept „Bruune Kook op Blech, schüddelt“. Denn kann ok Mama dat nabacken. Veele Mamas hebbt en Mapp anleggt mit Römsinger Waffeln, Plattdüütsche Amerikaners, Bottermelkkoken, Brausekoken un... un...

Siet ölven Johr maakt se dat nu in de ADS-Wilhelm-Gehlsen-Kinnergorn in Husum-Dreemöhlen, ehrenamtlich, Angelika Albertsen-Kruse. Anfungen is se mal mit ehr egen Jungs in de Kinnergorn. Eenmal in de Week „Plattdüütsche Backen“ mit negen bit dörtein Kinner. De Jungs sind nu groot. Man, dat „Plattdüütsche Backen“ is bleven.

Bahne, Celine, Paulina un Co. – all warrn se in de Gang sett: „Lena, kannst Du mal de Melk holen? Jesper holt de Nööt un Bahne de Waag.“ Paulina weet, wor de Hunni-Putt steiht. Eier hörn dorto un ok Gewürze. Un denn geiht dat los.

Angelika is nich bang. De Lütten dörven all mit anfaten, jeder kriggt sien Opgaav. „Bi de Hunni musst Du en beten kratzen – de mutt erst warm warrn. Un de Melk mööt Jem bit na de tweehunnerter Streek utgeten.“ Un Kinner sind ok nich bang. „Wo is mien Schlunt?“ prahlt Angelika. Dor is doch wull en beten Melk dorneven sprütt.

Allns nich schlimm. Eier openschlaan an de Kant vun de Glasschüddel, dat kann man ok all mit veer Johr. Dat schmeert so schön. Un Mehl is liekers all op de ganze Disch verdeelt. Angelika is Profi. Se gifft klore Anwiesungen. „Dumme Tüüg maakt warrd nich. Jesper, denn nimm erstmal de grote Schüddel un schüddel mal de dröge Deel vun de Deeg hen un her. Hest Du soveel Knööv? – De Mixer bruukt wi hüüt nich!“

Opto gifft dat en plattdüütsche Riemel: „Mama, worum is de Himmel so rot? Dor backen de Engels de Stuten – för all de lütten Leckersnuten.“

All Kinner dörven schüddeln erst de dröge Kraam un denn dat Schmeerige. Toletzt kummt dor so’n bruune Klackermatsch heruut. Un de Kinner weten nich so recht. Is dat nu lecker? Kann dat noch lecker warrn? Alina hett dat Backpapier torechtschneden. Julia holt de Tung un en Löpel – so kummt de Deeg nu op Blech. Un denn geiht dat af in de Backaav.

Genau regelt is ok, wer hüüt afwaschen dörv. Sogor mit Hand afklatschen achteran – dat Plattdüütsche „High five“. In dat Öller ritt man sik noch um de Arbeit. Un gar nich opfulln is egentlich, dat Angelika de ganze Tiet Plattdüütsch schnackt un de Lütten ehr op Hochdüütsch antworten doon. Verstahn hebbt se allns – ob de Kinner dat viellicht gar nich markt hebbt?

Ingwer Oldsen