Plattdüütsch kreativ

Artikel aus dem Nordfriesland Tageblatt vom 12. Februar 2009

In de Regionalschool in Niebüll steiht ok Plattdüütsch op de Stünnplan.
De Kinner besökt „Themenklassen“, de bit to en qualifizeerte Schoolavschluss wiederföhrt warrn – ok de plattdüütsche „Sprachenklasse kreativ“.

Nordfreesland – „In de Plattdüütschklass bin ik, weil ik enfach gern Platt snacken do.“ „Ik bin hier, weil wi soveel Theater speelen könnt.“ „Erst heff ik Freesch lernt un nu dach ik, Plattdüütsch weer ok noch ganz schön.“ Finn, Bjarne, Celina, Tessa un all de annern Kinner schühm’ meist över vör Begeisterung.

‚En Regenworm seet in de Eer un dach bi sik: Wat will ik mehr?’. . . Dat Gedicht vun Hans Hansen Palmus kummt in disse Stünn meist en beten kort. Ne, Platt snacken mit de vun de Zeitung un mit up Bild kamen, is totiet enfach spannender. Luuter begeisterte Kinner sitten in de Klass „Sprachenklasse kreativ“ bi de Regionalschool Niebüll. Robin kummt dorför sogor extra ut Bargum na de Niebüller School.

Schwerpunkt Plattdüütsch – so heet dat in’t Schoolprogramm un up de Stünnplan steiht to lesen: Twee Stünn Plattdüütsche Theater un Sprakenlehr, een Stünn Englische Theater, twee Stünn Kunst/Technik un twee Stünn Sport. Allns is dorup utricht, dat de Kinner in de ganze Ünnerricht mit grote Leichtigkeit verschedene Spraken bruuken könnt. Un as man sehen un hören kann mit veel Erfolg.

Plattdüütsch is in de Plattdüütschstünn ganz sülmsverständli Ünnerrichtsspraak. De Kinner, de vun Huus ut Platt snacken, helpen de annern, de dat noch nich so könnt. Dor gifft dat keen hämische Utlachen – dor is dat Ziel, mitnanner Plattdüütsch to snacken. Fru Rahtjen, de Englischlehrerin, vertellt, dat de Kinner de Motivation mit röver in de Englischünnerricht nehmen. Sogor in Mathe gifft dat niege kreative Ideen.

Dorbi sind dat all ganz normale Kinner, de Football speelen, gern vör de Computer sitten, in’t Fernsehen de Simpsons kieken, de sik ok mal mit Broder oder Schwester strieden un Karnickels as Huustiern hebbt.

Avers – de halve Klass hett sik anmeldt för en Theaterwarksteed up Platt bi de Jugendhof Scheersbarg. Un Anfang März gifft dat dor en öffentliche Uptritt bi en plattdüütsche Speelgruppendrapen.

In de 5. Klassen gifft dat veer Themenschwerpunkte: „Sprachenklasse kreativ“, „Technik und Informatikklasse“, „Fit for life-Klasse“ un „Sportklasse“. För de Regionalschool Niebüll is dat ganz wichtig, dat keen Kind sik utgrenzt föhlt. De Themenklassen könnt bit to en qualifizeerte Schoolavschluss wiederföhrt warrn. Na de 6. Klass hebbt de Kinner denn de Möglichkeit un wählen en anner Schwerpunkt ut Technik un Arbeitswelt.

„Ganz ehrlich, as wi dat all plaant hebbt, weer ik en beten bang“, seggt de Plattdüütschlehrerin Fru Gottburgsen. „Bi all de schönen Themen – warrn dor nuch Kinner Plattdüütsch wählen? Avers, in Nullkommanix weer de Klass vull – dat weer, as wenn de Lüüd dorup luurt harrn, dat de Kinner Plattdüütsch wählen könnt.“

Ingwer Oldsen