Plattdüütsche School 2008

Artikel aus dem Nordfriesland Tageblatt vom 25.07.2008

Mit de Siegel „Plattdüütsche School 2008“ wurrn dree nordfreesche Schooeln uttehend: de Theodor-Mommsen-School in Gaarn, de Grundschool Enge-Sande un de Realschool Niebüll.

Nordfreesland / Kiel / gfl – Rund 50 Scholen harrn sik bi de Schleswig-Holsteensche Landdag üm dat Siegel „Plattdüütsche School 2008“ bewurben. Teihn wurrn uttekend un dree Scholen dorvun kamen ut Nordfreesland.

Grote Loff geev dat vun de „hohen Damen un Herrn“ ut de Landdag in Kiel as de dree Scholen ut Nordfreesland besunners uttekend wurrn, wieldat se sik för dat Plattdüütsche över de Maten stark maken.

Mit de Landdagspräsident Martin Kayenburg, sien Vizepräsidentin Frauke Tengler, Bildungsministerin Ute Erdsiek-Rave un en Reeg vun Avordnete töfte en grote personelle Opgebot in de Kieler Landdag op de Vertreters vun de nordfreeschen Scholen. De leten sik avers ok nich lumpen un weern mit Schölers, Lehrers, Öllernvertreters, Börgermeister un sogar Kreispräsident Albert Pahl anreist, üm de grote Utteknung „Plattdüütsche School 2008“ in Empfang to nehmen.

„Dor sind Profis an’t Wark“, stellte de Bildungsministerin Erdsiek-Rave fast, as se för de Theodor-Mommsen-School ut Gaarn de Laudatio heel. Besunners löövte se de Tosamenarbeit vun de School mit de Eiderstedter Heimatbund un de Fördervereen för Kunst un Kultur in Gaarn. De plattdüütsche Unnerricht för 180 vun 272 Schölers geven de ehemaligen Lehrkräfte Anke Dellin un Hildegard Petersen. Mit Jan Tetens stellt de Eiderstedter School de Landessieger 2008 bi „Schölers leest Platt“.

„De Kinner vun unse Grundschool in Enge-Sande wassen in en plattdüütsche Gemeende op un möten dorüm ok in de School mit disse Spraak konfronteert warrn“, steiht in dat Schoolprogramm vun disse lüttje Dörpsschool mit 62 Schölers. Un wieldat de Lehrers keen Plattdüütsch köönt, hebben de Öllern dat in de Hand nahmen un sorgen för en bannig erfolgrieke Platt-Angebot. Mit Momme Thiesen kummt ok de Regionalsieger in „Schölers leest Platt“ ut Enge-Sande. De Schoolleitersche Andrea Weiner, de Öllernvertreter Birte Matthiesen un Karen Gregersen un de stellvertretende Börgermeister Jochen Muxfeldt nehmen dat Siegel vull Freud mit na Huus.

„Disse Realschool ut Niebüll is wat dat Plattdüütsche angeiht, dat Beste watt wi in ganz Schleswig-Holsteen hebben“, weer dat Urdeel vun Vizepräsidentin Frauke Tengler. Un de mutt dat weten, wegen se de Vörsittersche vun de AG Bildung in de Biraat Nedderdüütsch vun de Landdag is. Se löövte de bannig gode Bewarbung, dat enorme Plattdüütsch-Angebot in de Ünnerricht un de Tosamenarbeit mit vele Partners na buten hen. „Platt is en faste Bestanddeel in de Niebüller Realschool un Fru Malene Gottburgsen ist de Garant dorför“, so de Vizepräsidentin Tengler mit en grote Loff op de Niebüller School, de nu all dat twete Mal dat Platt-Siegel kregen hett.

Mit en ganze Reeg vun Sketche bewiesten de nordfreeschen Schölers ok in dat Landeshuus an der Ostsee, dat se de plattdüütsche Spraak mächtig sind. Un as de Landdagspräsident de grote Ehrung to Enn bröcht harr, denn gung dat mit allemann an dat grote Buffet. Mit Pizza un Koken in de Maag kunnen sik alle satt, tofreden, stolt un fröhlich wedder torüch op de Weg na Nordfreesland maken.

Disse teihn Punkte warrn bi dat Siegel „Plattdüütsche School“ bewertet: